Հնվ 10 2025

Փոփոխություններ Հայաստանի Աշխատանքային օրենսգրքում

Հաշվի չառնելով գործարար համայնքի, գործարարների միավորումների և արհմիությունների առարկությունները՝ Ազգային ժողովը հաստատեց Հայաստանի Աշխատանքային օրենսգրքում փոփոխություններ կատարելու մասին  օրենքի նախագիծը՝ աշխատանքային պայմանագրերի ստորագրման էլեկտրոնային համակարգ ներդնելու  վերաբերյալ։ Նոր էլեկտրոնային համակարգը (որը նախատեսվում է ինտեգրել ներկայիս հարկային հաշվետվությունների համակարգերի հետ) պետք է օգտագործվի աշխատանքային պայմանագրերի ստորագրման, փոփոխման և դադարեցման համար։ Համակարգում ներբեռնման ենթակա է լինելու նաև մինչ համակարգի շահագործման մեկնարկը կնքված պայմանագրերի վերաբերյալ տեղեկատվությունը։ Նոր համակարգը նախատեսվում է գործարկել 2025 թվականի հուլիսից կամավոր կարգով, իսկ 2026 թվականի հունիսից՝ որպես համապարտադիր։ Կարծում ենք, որ ներդրվող փոփոխությունները ավելի շատ մարտահրավերներ ու դժվարություններ են ստեղծելու, քան խնդիրներ լուծելու, մասնավորապես դրանց արդյունքում առնվազն՝

• Բարդանում է նվազագույն պահանջներից բացի աշխատանքային հարաբերությունների տեսանկյունից այլ  կարևոր հարցերի կարգավորում ենթադրող  աշխատանքային պայմանագրերի ստորագրումը,
• Ստեղծվում է լրացուցիչ գործառնական և ծախսային բեռ ներդրողների և գործատուների համար, այդ թվում՝ ստիպելով մուտքագրել տեղեկատվություն արդեն իսկ կնքված՝ ընդհանուր առմամբ հարյուր հազարավոր պայմանագրերի վերաբերյալ (որոնց մեծ մասը արդեն իսկ հասու են պետությանը հարկային հաշվետվությունների միջոցով),
• Բարդանում է աշխատանքային պայմանագրերի ստորագրումը այն անձանց հետո, ովքեր ունեն տեխնոլոգիաների սահմանափակ հասանելիություն կամ տեխնոլոգիական հմտությունների պակաս։